|
Daugstad/Vike
Skulekorps
Både
på Daugstad og i Vike var det vaksnekorps i mange år, men etter
kvart førte «flukta frå bygda» til at det vart vanskeleg å
halde ei brukbar besetning. Same problemet hadde dei i Tresfjord,
og ei tid hadde me eit korps samansett av musikantar frå alle tre
bygdene.
Først i 60-åra
vart det starta guttemusikkorps i Vike, og dette fekk låne
instrumenta til vaksnekorpset. Dette korpset var ikkje så stort
at ein hadde fullverdig besetning, men i 1968 gjekk Daugstad og
Vike, med aktiv innsats frå rektorane Reidar Dahle og Kåre
Rypdal, saman om eit skulekorps, og dette har sidan vore i
verksemd utan stopp. Musikkonsulent Arne Klingsaid var den første
dirigenten. Han vart i 1973 avløyst av Henry Vike, og sidan har
korpset hatt mange dirigentar. No er det Hege Haugen som svinger
taktstokken.
Både talet på
medlemmer og den musikalske kvaliteten har svinga, men stort sett
har korpset hatt ord på seg for å vere mellom dei beste i
fylket. Korpset har vore på mange turar og delteke i konkurransar
med godt resultat. Saman med andre korps i kommunen spela dei inn
ein kasett, og midt i 80-åra hadde korpset to halvtimes program i
NRK Møre og Romsdal, som fekk svært god kritikk.
Rekrutteringa til
korpset er god, og dei siste par åra har også unge frå
Tresfjord vore med i korpset. Talet på medlemmer har svinga frå
ca. 25 til opp i mot 40, alt etter korleis tilgangen på nye
medlemmer i høve til naturleg avgang har vore. Til tider hadde
det vore ynskjeleg at medlemmene ikkje slutta så tidleg, ved
14-15 års alder. Dette har vel noko med skulesituasjonen å gjere
også. Elles har dei flinkaste vore svært ettertrakta av dei
vaksne korpsa, og nokre år var omkring 10 av dei eldste også med
i Romsdal Janitsjar. Eit par sesongar var det medlemmer frå
Daugstad/Vike Skulekorps med i korps og orkester i både Ålesund,
Molde, Åndalsnes, Vestnes og Tomra. Då kunne det av og til bli
kollisjonar med øvingane og konsertane, men oftast ordna det seg.
Korpset har
til vanleg hatt bra fullverdig
janitsjarbesetning, og var nokre år einaste skulekorpset
som hadde spesialinstrument som obo og fagott. Då hadde korpset
sin eigen blåsekvintet, noko som var heilt spesielt for eit
skulekorps. - År om anna har også korpset hatt så god besetning
at ein har kunna sett saman eit fullverdig storband, 5 saksofonar,
4 trompetar., 4 tromboner. og fullt komp. Nemnet vart
DAVIS STORBAND. Dette har vore særs populært.
Saksofonkvintetten frå bandet var også med i eit
radioprogram i NRK. Eit år hadde korpset også jazzband.
Økonomien er eit
stort problem for alle korps, men Daugstad/Vike skulekorps har
heile tida hatt bra økonomi. Sume av dirigentane har avstått frå
honorar, men idag er dette noko ein ikkje bør rekne med. I
samarbeid med Vestnes musikkskule leiger ein no tenester frå
denne og det kostar sjølvsagt ein god del. Difor er diverse
innteksttiltak nødvendige, men det er samstundes sosialt for
foreldra og andre interesserte, og korpset har alltid god
tilslutnad til arrangementa sine.
Det er grunn til
å spå korpset ei god framtid.
H.V.
Henry
Vike var dirigent for Daugstad/Vike Skulekorps i 2x3 år, og han
hadde ord på seg for å være en veldig dyktig dirigent. (red. anm.)
|
